हिवरा आश्रम येथील शारदामाता गर्ल्स होस्टेलचे लोकार्पण

हिवरा आश्रम :- ‘तुम्ही मुली जगवा, मी त्यांना शिक्षण देतो, परंतू त्यांना गर्भात मारु नका’ असे आवाहन करत स्त्रीभ्रूणहत्येला कडाडून विरोध करणारे कर्मयोगी संत शुकदास महाराज यांनी लोकवर्गणी व स्वत: रुग्णसेवेच्या पेशातून निर्माण केलेल्या शारदामाता गर्ल्स होस्टेलच्या इमारतीचे बांधकाम पूर्ण झाले असून लवकरच मुख्यमंत्री देवेंद्र फडणवीस यांच्याहस्ते या इमारतीचे लोकार्पण अपेक्षित आहे.
या इमारतीसाठी साडेचार कोटी रुपये खर्च आला असून अत्यल्पदरात गोरगरिबांच्या मुली या होस्टेलमध्ये राहून आपले शिक्षणाचे स्वप्न साकार करु शकणार आहेत. खेड्यापाड्यातील मुलींना शिक्षणाची सोय नसल्याने या मुली दहावी-बारावीनंतर उच्च शिक्षण घेऊ शकत नाहीत. त्यांना उच्च शिक्षणासाठी शहरी भागात जावे लागते व शहरात त्यांच्या सुरक्षिततेचा प्रश्‍नही पालकांना सतावत होता. त्यामुळे खेड्यापाड्यातील पालकांनी आमच्या मुलीच्या शिक्षण व राहण्याची सोय विवेकानंद आश्रमात करा, असे आर्जब विवेकानंद आश्रमाचे संस्थापक पू.शुकदास महाराज यांनी घातले होते. पालकांच्या आग्रहास्ताव महाराजश्रींनी आपले हजारो कार्यकर्ते लोकवर्गणीसाठी खेडोपाडी पाठवून शारदामाता गर्ल्स होस्टेलचा प्रकल्प हाती घेतला होता. या इमारतीसाठी समाजात विलक्षण वाढलेले स्त्रीभू्रणहत्येचे प्रमाण पाहूण पू.शुकदास महाराज हे प्रचंड व्यथित झाले होते. त्यामुळे त्यांनी हिवरा आश्रम येथेच आध्यात्मिक व भयमुक्त वातावरणात गोरगरिबांच्या मुलींना शिक्षण घेता यावे, त्यांच्या निवासाची सोय व्हावी, म्हणून या गल्स होस्टेलची अद्ययावत इमारत उभारली आहे. त्यानुसार चारमजली व 96 खोल्या असलेल्या इमारतीचे निर्माण कार्य पूर्ण झाले आहे.
विशेष बाब म्हणजे, या इमारतीचे भूमिपूजनही महाराजश्रींनी मुलींच्याहस्ते करवून घेतले होते. एकूण चार मजले असलेल्या या इमारतीत प्रत्येक मजल्यावर 24 खोल्या आहेत. तर एका खोलीत सहा मुली राहू शकतात. अशाप्रकारे 96 खोल्यांमधून 576 मुलींच्या राहण्याची सोय या गर्ल्स होस्टेलमध्ये झाली आहे. निवास व भोजन अशी सोय या इमारतीत आहे.